gan
Janice Thomas
Atgofion lu o’r Nadolig yn y Swyddfa Bost
Mae Siopa Dolig wedi mynd yn fusnes stressful. Mae’r arfer o deithio’n arbennig i’r ddinas fawr i chwilio’r anrheg berffaith ac i gael yr holl bitsach sydd angen wedi mynd yn gymaint o draddodiad erbyn hyn â’r canu carolau.
Fues i’n lwcus iawn i gael magwraeth hyfryd yn ferch i siop y pentre’.
Roedd amser Nadolig yn gyfnod hapus iawn ac roedd gweld yr ‘outers’ o ddanteithion yn cyrraedd ar y troli mawr a chael wâc i Bookers ar brynhawn dydd Mercher i weld yr arlwy oedd ar gael ar gyfer yr ŵyl yn rhywbeth i’w ryfeddu!
Roedd Dad wastad yn cadw 3 bocs o siocledi Milk Tray anferth. Ydych chi’n cofio nhw? Y rhai gyda llun ceffyl a chart ar y clawr. Un haenen berffaith o siocledi. Roedd 2 o’r rheiny yn mynd ar y silff ucha un fel bod pawb yn gallu eu gweld.
OND, yr amser mwyaf cyffrous oedd pan roedd y bocsys yn dechre cyrraedd y parlwr. Bocsys? Ie, bocsys. Meddyliwch am y fasged fach yna yng nghornel eich hoff wefan siopa, wel, yr un peth â honna ond roedd hi yn ein parlwr ffrynt ni yn y Post. Bocs cardfwrdd gyda enw person, tŷ neu fferm arni. A pan fyddai’r fam (rhan amla) yn galw mewn am negeseuon o ddiwedd mis Tachwedd ymlaen byddai rhywbeth bach yn mynd mewn i’r bocs ar gyfer y Nadolig. After Eights, Selection box i’r plant, llyfrau Cymraeg fel anrhegion, potel fach o ‘Blue Nun’, cnau, sugared almonds pinc a melyn a glas oedd yn edrych fel cerrig bach lan y môr. Roedd y llawr, y bwrdd a’r dresser yn llawn o focsys. Cymaint fel bod rhaid camu’n ofalus rhyngddynt i gyrraedd pen pella’r ystafell.
Rhoedd hefyd llyfr ‘orders’ oedd yn cael ei gadw yn y drôr wrth ymyl y glorian pwyso. Llyfr pwysig oedd hwn. Rhestr siopa i deuluoedd y pentre oedd yn cael ei chadw yn y siop yn hytrach nag ar-lein. “Rho’ hanner pownd o sbrowts lawr i fi”. “Cofia’r Ham – 10 sleisen, thick cut”. Poteli o Corona (y pop nid y cwrw!) Byddai’r rhestrau yn faith. Tanjerins a ffrwythau, llysiau, caws a hufen. Pob dim oedd angen ar gyfer y diwrnod mawr. A’r cyfan yn cael mynd i’r bocs yn y parlwr 2 ddiwrnod cyn Dolig.
Dw i ddim yn dweud nag oedd pobol yn siopa mewn llefydd eraill ond roedd hwn yn ffordd hawdd o gadw beth oedd angen.
Wrth gwrs, roedd Dad yn cofio archebu digon o Paxo a jariau o Cranberry Sauce achos bydde digon o bobol yn galw mewn noswyl y Nadolig ‘wedi anghofio’! Ac yna, bore Dolig byddai’r bobl yn galw yn drws y bac achos odd Santa wedi anghofio’r batris ar gyfer y tegan newydd!
A’r wers yn y stori? Ydyn ni’n or-gymhlethu beth sy’n bwysig? Yn dilyn y cyfnod clo, y siopau bach lleol wnaeth cadw ni gyd i fynd. Felly, beth am dalu’r ffafr trwy eu cefnogi nhw? Mae gan Felinfach y Post, y Cop, y Garej a’r Vale. Dwi’n siŵr y gallech chi ddod i ben â chwilio cardiau, llyfr, tegan, dillad, potel o win, tocyn rodd neu hampyr o fewn y pentre – a bydde pawb yn y teulu yn hapus!
Defnyddiwch eich siopau bach lleol – mae’n costio llai o ddiesel (gallech chi hyd yn oed mynd ar y bws!). Gall siopau bach lleol Llambed ac Aberaeron ynghyd â’r ffeiriau Dolig di-ri eich helpu i safio amser ac arian y Nadolig hwn. Ewch amdani.
Ohhh ie, a’r trydydd bocs o Milk Tray? Byddai un ffarmwr arbennig yn dod mewn pob blwyddyn ar noswyl Nadolig – am bump o’r gloch – i whilo ‘Christmas Box’ i’r wraig! Byddai’r siop leol wedi neud yn siŵr bod ei wraig yn cael anrheg bob blwyddyn!