Buddugoliaeth bwysig

Yn eistedd yn drydydd yn y gynghrair, mae rhaid i Aberaeron ennill pob gêm o weddill y tymor os am ddyrchafiad i’r ail adran y tymor nesa’. Roedd yna brawf anodd yn eu gwynebu’r Sadwrn diwetha’ wrth i Hwlffordd ymweld â Pharc Drefach. Dyma’r trydydd tro i’r ddau dîm gwrdd y tymor ’ma gyda’r Gwylanod yn llwyddiannus ar y ddau ymweliad â Phont Fadlen ynghynt yn y tymor gan ennill yn gyntaf yn y gynghrair ag yna mewn gêm gwpan yr wythnos ganlynol. Roedd disgwyl i’r ymwelwyr ddod lan gyda thîm cryf a felly buodd hi.

Camgymeriadau ag amddiffyn cryf

Ni sgoriwyd unrhyw bwyntiau yn yr hanner cynta` gan i’r ddau dîm wneud gormod o gamgymeriadau ac mi oedd amddiffyn y ddau yn rhoi terfyn ar unrhyw fygythiad i dorri trwyddo tuag at y llinell gais. Cafwyd rhediadau cryf gan yr asgellwr a chyd enillydd Seren y Gêm dros Aberaeron, Steffan “DJ” Jones a’r cefnwr, Jac Crompton, ond yn ofer.

Cais o’r diwedd

Daeth Hwlffordd allan yn gryf wedi’r egwyl, gan agor y sgôr gyda chic gosb hawdd o flaen y pyst wedi tua deng munud o chwarae. Mi ymatebodd Aberaeron ar unwaith, diolch i Steffan “DJ” Jones yn cipio cic gosb o’r ail-ddechrau. Cafodd y bêl ei chicio i’r cornel gan Steffan Rees, ac o’r lein, gwnaeth sgarmes rydd bwerus Aberaeron symud tua’r llinell gais. O’r sgarmes, cododd y mewnwr, Dafydd Llewelyn y bêl, gan lithro i’r ochr dywyll a sgorio cais yn y cornel. Cafodd ei throsi gan Rhodri Jenkins

Y sgrym o dan bwysau

Roedd pac cryf Hwlffordd yn achosi problemau i Aberaeron yn y sgrymiau. Rhaid canmol gwaith gwyrthiol yr wythwr a chyd enillydd Seren y Gêm, Will James i gadw’r bêl ym meddiant y tîm cartref gan groesi’r llinell fantais yn gyson. Gwnaeth hyn gadw pwysau ar yr ymwelwyr ac mi enillodd Aberaeron gic gosb. Trosiwyd y gic gan Rhodri Jenkins i adael y tîm cartref saith pwynt ar y blaen gyda tua ugain munud o’r gêm i fynd.

Cyfnod o chwarae arbennig gan y Gwylanod

Wrth i’r gêm fynd yn ei blaen aeth Aberaeron yn fwy hyderus ac ni welwyd y camgymeriadau trafod fu’n eu dal yn ôl ynghynt. Engraifft o hyn wnaeth arwain at ail gais Aberaeron. Wedi casglu cic ymlaen gan Hwlffordd ar linell gais Aberaeron, mi wnaeth y capten, Morgan Llewleyn wrth-ymosod. Aeth y bêl trwy nifer o ddwylo gan groesi’r llinell hanner ffordd cyn i Hwlffordd droseddi.

Teimlad o ryddhad wedi’r ail gais

Hyd yn hyn, mi roedd y gêm yn y fantol gan fod Hwlffordd yn barod i ymosod ar bob cyfle gyda’r bygythiad o ddod yn gyfartal. Gwnaeth Bruce Gaskell a Gethin Dafis o’r fainc ychwanegu at gryfder Aberaeron wrth ymosod. O’r gic gosb a ddyfarnwyd yn erbyn Hwlffordd wedi’r ymdrech i redeg o ddyfnder, mi symudwyd y bêl trwy’r dwylo ac mi wnaeth Will James ennill tir. O’r sgarmes trosglwyddwyd y bêl yn ôl trwy’r olwyr tuag at Morgan Llewelyn. Cafodd ei daclo tua phum metr yn brin o’r llinell gais gyda’r amddiffynnwr yn dwyn y bêl o’i ddwylo. Yn anffodus i’r amddiffynnwr, mi wnaeth mewnwr Aberaeron, Dafydd Llewelyn gipio’r bêl o’i ddwylo ef a chroesi am gais arbennig. Eto, bu Rhodri Jenkins yn llwyddiannus gyda’r trosiad.

Amddiffyn

Gyda chwarter awr o’r gêm yn weddill, mi roedd gan Hwlffordd ddigon o amser i ennill. Er y pwysau cynyddol, mi wnaeth amddiffyn y tîm cartref eu cadw allan tan y chwarae olaf pan ddyfarnwyd cais gosb iddynt wedi hir bwyso ar linell gais Aberaeron.

Eto, rhaid canmol amddiffyn Aberaeron yn y gêm ’ma. Mi roedd y gwrthwynebwyr yn dîm cryfach y tro hwn ac mi wnaeth y tîm cartref eu curo am y trydydd tro.

Wrth edrych ymlaen, bydd Aberaeron yn wynebu Pontyberem oddi cartref dydd Sadwrn nesa’, gan geisio adeiladu ar eu llwyddiant parhaus.

Y Gwylanod 12 – 19 Clwb Athletig Aberyswyth

Chwaraeodd y Gwylanod gêm gyfeillgar nôs Wener yn erbyn Clwb Athletig Aberystwyth. Cyfartal oedd  canlyniad y gêm gyfatebol ar Gae Plascrug ynghynt yn y tymor ac mi oedd hon eto yn gêm agos. Aberystwyth bu’n fuddugol ac mi sgoriodd Mathew Harries ag Osian Davies gais yr un dros Aberaeron. Bu Mathew Harries yn llwyddiannus gydag un trosiad. Dyfarnwyd yr “hen ben”, Tudur Jenkins yn seren y gêm.