gan
Carys Mai
Naomi Seren, Carwyn Blayney, Mari Mathias ac Eddie Ladd
Mari Mathias a Eddie Ladd yn brwydro yn erbyn y blinder
Oes modd creu darn o theatr mewn un noson? Wel, oes glei!
Daeth pedwar person creadigol at ei gilydd nos Wener d’wetha i ymgymryd â her y Theatr Unnos yn rhan o’r Ŵyl Ddrama. Cafodd Eddie Ladd, Carwyn Blayney, Mari Mathias a Naomi Seren eu cau yn Theatr Felinfach am 12 awr i greu, dychmygu, byrfyfyrio a chyflwyno darn o theatr yn seiliedig ar y thema ‘Pontydd’.
Cafwyd perfformiad hudolus ac ysbrydoledig ar y bore Sadwrn, ar ôl cwta 12 awr o greu ac ymarfer. Cawsom ein tywys at bob math o bontydd, o’r diriaethol i’r haniaethol, o bontydd offerynnau cerdd i bontydd rhwng y gorffennol a’r presennol. Cyfunwyd elfennau corfforol gydag interliwdau cerddorol a chyffyrddiadau hiwmor ysgafn a digon o brocio cydwybod y gynulleidfa. Mae’n anodd credu bod y criw wedi llwyddo i greu perfformiad mor gyflawn a gorffenedig mewn cyn lleied o amser.
Dyma’r tro cyntaf i’r Theatr Unnos gael ei lle yn arlwy’r Ŵyl Ddrama, sy’n bartneriaeth rhwng Theatr Gydweithredol Troed-y-rhiw a Theatr Felinfach, ond rwy’n eitha siŵr taw dim dyma fydd y tro olaf!